5. ഫിലെമോന്‍ എന്ന ഗ്രീക്ക് വൈദ്യന്‍
യേശുവിനെ കുറിച്ച്
ആ നസ്റേന്‍ അവന്റെ ജനതയുടെ ഏറ്റവും മികച്ച വൈദ്യനായിരുന്നു . മറ്റാര്‍ക്കും നമ്മുടെ ശരീരത്തെ പറ്റിയും, അതിന്റെ ധാതുക്കളെയും ഗുണങ്ങളെയും പറ്റിയും അത്രയധികം അറിവില്ലായിരുന്നു .
ഈജിപ്തുകാര്‍ക്കും ഗ്രീക്കുകാര്‍ക്കും അറിവില്ലാതിരുന്ന രോഗങ്ങള്‍ ബാധിച്ചവരെപോലും അവന്‍ സുഖപെടുത്തി. അവന്‍ മരിച്ചവരെ പോലും ജീവിതത്തിലേക്ക് തിരിച്ചു കൊണ്ടുവന്നു എന്ന് പറയുന്നു അവര്‍ . സത്യമായാലും അസത്യമായാലും അത് അവന്റെ കഴിവിനു തെളിവാണ് . കാരണം മഹത്കാര്യങ്ങള്‍ നിവര്ത്തിച്ചവരെമാത്രമാണല്ലോ വാഴ്ത്തുന്നത് .
യേശു രണ്ടു നദികളുടെ സമതലരാജ്യമായ ഇന്ത്യ സന്ദര്‍ശിച്ചു എന്നും അവര്‍ പറയുന്നു . അവിടത്തെ മഹര്‍ഷികള്‍ നമ്മുടെ ശരീരത്തിലെ ഓരോ അണുവിലും ഒളിഞ്ഞിരിക്കുന്ന രഹസ്യങ്ങളെ അവനു വെളിവാക്കി എന്നും .
ആ അറിവ് അവനു കൊടുത്തത് ദൈവങ്ങള്‍ നേരിട്ട് തന്നെയും ആവാം , മഹര്‍ഷികളില്‍ കൂടെ ആയിരിക്കില്ല .യുഗങ്ങളായി മനുഷ്യര്‍ക്ക്‌ അജ്ഞാതമായിരുന്നതെല്ലാം ഒരു നിമിഷം കൊണ്ട് ഒരുവന് അറിവായി . ഒരു അജ്ഞാനിയുടെ ഹൃദയത്തെ സൂര്യദേവന്‍ തന്റെ കരസ്പര്‍ശം കൊണ്ട് ജ്ഞാനിയാക്കിയെക്കാം
തിരിയന്‍ , തീബന്‍ ജനങ്ങള്‍ക്ക്‌ ജ്ഞാനത്തിന്റെ പല വാതിലുകളും തുറന്നിരുന്നു . ഈ മനുഷ്യനും ചില മുദ്രിതമായ വാതിലുകള്‍ തുറക്കപെട്ടു . അവന്‍ ശരീരമെന്ന ആത്മാവിന്റെ കോവിലില്‍ പ്രവേശിച്ചു . അവന്‍ അവിടെ നമ്മുടെ ജീവതന്തുക്കളെ ഹനിക്കുന്ന ദുഷ്ടാത്മാക്കളെ കണ്ടു. ജീവനെ നൂല്ക്കുന്ന ശിഷ്ടാത്മാക്കളെയും .
ഞാന്‍ കരുതുന്നു എതിര്‍പ്പിന്റെയും ചെറുത്തുനില്‍പ്പിന്റെയും ശക്തികൊണ്ടാണ് അവന്‍ രോഗികളെ സുഖപെടുത്തിയത് എന്ന് എങ്കിലും അത് ഞങ്ങള്‍ വേദാന്തികള്‍ക്ക് അജ്ഞാതമായ വിധത്തിലായിരുന്നു . അവന്‍ ജ്വരത്തെ തന്റെ മഞ്ഞുപോലെ തണുത്ത സ്പര്‍ശത്താല്‍ വിസ്മയിപ്പിച്ചപ്പോള്‍ അത് പിന്‍വാങ്ങി . കൈകാലുകളിലെ മരവിച്ച പേശികളെ അവന്റെ ശാന്തത ആശ്ചര്യഭരിതരാക്കുകയും അവ അവനു വഴങ്ങി ശാന്തരാകുകയും ചെയ്തു .
ചുളിഞ്ഞ തൊലിക്കുള്ളിലെ ക്ഷയിച്ചുകൊണ്ടിരിക്കുന്ന ജീവസത്തയെ അവന്‍ തൊട്ടറിഞ്ഞു . പക്ഷെ അവന്റെ വിരലുകള്‍ ആ സത്തയെ എങ്ങിനെ തേടിപിടിച്ചു എന്നെനിക്കറിയില്ല .തുരുംമ്പിനകത്തെ ഉരുക്കിന്റെ ശബ്ദം അവന്‍ അറിഞ്ഞു . പക്ഷെ അവന്‍ എങ്ങിനെ വാളിനെ സ്വതന്ത്രമാക്കി തിളക്കി എന്ന് ഒരാള്‍ക്കും പറയാന്‍ കഴിയില്ല .
ചിലപ്പോള്‍ എനിക്ക് തോന്നും അവന്‍ സൂര്യന് കീഴിലുള്ള എല്ലാ ചരാചരങ്ങളുടെയും വേദനയുടെ ഞരക്കം കേട്ടിരുന്നു എന്നും , അവന്‍ അവയെ ഉയര്‍ത്തി അവയ്ക്ക് താങ്ങും തുണയുമായി എന്നും . അത് അവന്റെ അറിവുകൊണ്ട്‌ മാത്രമല്ല അവര്‍ക്ക് , ഉയര്‍ന്നു പൂര്‍ണ്ണരാവാനുള്ള അവരുടെ തന്നെ കഴിവിനെ അറിയിച്ചു കൊണ്ട് കൊണ്ടായിരുന്നു .
എങ്കിലും അവന്‍ സ്വയം അവനെ ഒരു വൈദ്യന്‍ എന്ന ചുമതലയുളളവനായി കരുതിയില്ല. അവന്‍ ഈ രാജ്യത്തെ മതത്തിലും രാഷ്ട്രീയത്തിലും സ്വയം മുഴുകി . എനിക്കതില്‍ ഖേദമുണ്ട് , കാരണം ഏറ്റവും പ്രധാനം ആരോഗ്യമുള്ള ശരീരം തന്നെ .
എന്നാല്‍ ഈ സിറിയക്കാര്‍, ഒരു രോഗം വരുമ്പോള്‍ ഒരു ഔഷധത്തെക്കാള്‍ ഒരു തര്‍ക്കത്തെ അന്വേഷിക്കുന്നു .
അവരുടെ ഏറ്റവും ശ്രേഷ്ഠനായ് ഭിഷഗ്വരന്‍ , പൊതു സ്ഥലങ്ങളിലെ പ്രഭാഷകനാവാന്‍ നിശ്ചയിച്ചത് ഖേദകരം തന്നെ .
(ജീസസ് ദി സണ്‍ ഓഫ് മാന്‍ .. ഖലീല്‍ ജിബ്രാന്‍ )
No comments:
Post a Comment