സൌന്ദര്യ ലഹരി 

ഭാഗം ഒന്ന് 

1

ശിവശ്ശക്ത്യായുക്തോ യദി ഭവതി ശക്തഃ പ്രഭവിതും

ന ചേദേവം ദേവോ ന ഖലു കുശലഃ സ്പന്ദിതുമപി

അതസ്ത്വാമാരാധ്യാം ഹരിഹരവിരിഞ്ചാദിഭിരപി

പ്രണന്തും സ്തോതും വാ കഥമകൃതപുണ്യഃ പ്രഭവതി

2

തനീയാംസം പാംസും തവ ചരണ പങ്കേരുഹഭവം

വിരിഞ്ചിഃ സഞ്ചിന്വന്‍വിരചയതി ലോകാനവികലം

വഹത്യേനം ശൗരിഃ കഥമപി സഹസ്രേണ ശിരസാം

ഹരഃ സംക്ഷുൈദ്യനം ഭജതി ഭസിതോദ്ധൂളനവിധിം

3

അവിദ്യാനാമന്തസ്തിമിരമിഹിരദ്വീപനഗരീ

ജഡാനാം ചൈതന്യസ്തബകമകരന്ദസ്രുതിഝരീ

ദരിദ്രാണാം ചിന്താമണിഗുണനികാ ജന്മജലധൌ

നിമഗ്നാനാം ദംഷ്ട്രാ മുരരിപു വരാഹസ്യ ഭവതി

4

ത്വദന്യഃ പാണിഭ്യാം അഭയവരദോ ദൈവതഗണ-

സ്ത്വമേകാ നൈവാസി പ്രകടിതവരാഭീത്യഭിനയാ

ഭയാത് ത്രാതും ദാതും ഫലമപി ച വാഞ്ഛാസമധികം

ശരണ്യേ ലോകാനാം തവ ഹി ചരണാവേവ നിപുണൌഃ

5

ഹരിസ്ത്വാമാരാധ്യപ്രണതജനസൌഭാഗ്യജനനീം

പുരാ നാരീ ഭൂത്വാ പുരരിപുമപി ക്ഷോഭമനയത്

സ്മരോപി ത്വാം നത്വാ രതിനയനലേഹ്യേന വപുഷാ

മുനീനാമപ്യന്തഃ പ്രഭവതി ഹി മോഹായ മഹതാം

6

ധനുഃ പൌഷ്പം മൌര്‍വീ മധുകരമയീ പഞ്ചവിശിഖാ

വസന്തഃ സാമന്തോ മലയമരുതായോധന രഥഃ

തഥാപ്യേകഃ സര്‍വം ഹിമഗിരിസുതേ! കാമപി കൃപാ-

മപാങ്ഗാത്തേ ലബ്ധ്വാ ജഗദിദമനങ്ഗോ വിജയതേ

7

ക്വണത്കാഞ്ചീദാമാ കരികളഭകുംഭസ്തനനതാ

പരിക്ഷീണാ മധ്യേ പരിണതശരശ്ചന്ദ്രവദനാ

ധനുര്‍ബാണാന്‍പാശം സൃണിമപി ദാധാനാ കരതലൈഃ

പുരസ്താദാസ്താം നഃ പുരമഥിതുരാഹോപുരുഷികാ

8

സുധാസിന്ധോര്‍മധ്യേ സുരവിടപിവാടീപരിവൃതേ

മണിദ്വീപേ നീപോപവനവതിചിന്താമണിഗൃഹേ

ശിവാകാരേ മഞ്ചേ പരമശിവ പര്യങ്ക നിലയാം

ഭജന്തി ത്വാം ധന്യാഃ കതിചന ചിദാനന്ദലഹരീം

9

മഹീം മൂലാധാരേ കമപി മണിപൂരേ ഹുതവഹം

സ്ഥിതം സ്വാധിഷ്ടാനേ ഹൃദി മരുതമാകാശമുപരി

മനോപി ഭ്രൂമദ്ധ്യേ സകലമപി ഭിത്വാ കുളപഥം

സഹസ്രാരേ പദ്മേ സഹരഹസി പത്യാ വിഹരസേ

10

സുധാധാരാസാരൈഃ ചരണയുഗളാന്തര്‍വിഗളിതൈഃ

പ്രപഞ്ചം സിഞ്ചന്തീ പുനരപി രസാമ്നായമഹസഃ

അവാപ്യ സ്വാം ഭൂമീം ഭുജഗനിഭമധ്യുഷ്ടവലയം

സ്വാത്മാനം കൃത്വാ സ്വപിഷി കുളകുേണ്ഡ കുഹരിണീ

11

ചതുര്‍ഭിഃ ശ്രീകണ്‍ഠൈഃ ശിവയുവതിഭിഃ പഞ്ചഭിരപി

പ്രഭിന്നാഭിഃ ശംഭോര്‍നവഭിരപി മൂലപ്രകൃതിഭിഃ

ചതുശ്ചത്വാരിംശത് വാസുദലകലാശ്രത്രിവലയ-

ത്രിരേഖാഭിഃ സാര്‍ദ്ധം തവ ശരണകോണാഃ പരിണതാഃ

12

ത്വദീയം സൌന്ദര്യം തുഹിനഗരികന്യേ! തുലയിതും

കവീന്ദ്രാഃ കല്പന്തേ കഥമപി വിരിഞ്ചിപ്രഭൃതയഃ

യാദാലോകൌത്സുക്യാദമരലലനാ യാന്തി മനസാ

തപോഭിര്‍ദുഷ്പ്രാപാമപി ഗിരിശ സായൂജ്യപദവിം

13

നരം വര്‍ഷീയാംസം നയനവിരസം നര്‍മ്മസു ജഡം

താപാങ്ഗാലോകേ പതിതമനുധാവന്തി ശതശഃ

ഗളദ്വേണീബന്ധാഃ കുചകലശവിസ്രസ്‌തസിചയാ

ഹഠാത് ത്രുട്യല്‍കാഞ്ച്യോ വിഗളിതദുകൂലാഃ യുവതയഃ

14

ക്ഷിതൌ ഷട്പഞ്ചാശദ്ദ്വിസമധികപഞ്ചാശദുദകേ

ഹുതാശേ ദ്വാഷഷ്ടിശ്ചതുരധികപഞ്ചാശദനിലേ

ദിവി ദ്വിഃഷട്ത്രിംശന്മനസി ച ചതുഷ്‌ഷഷ്ടിരിതി യേ

മയൂഖാസ്തേഷാമപ്യുപരി തവ പാദാംബുജയുഗം

15

ശരദ്‌ജ്യോത്സ്നാശുഭ്രാംശശിയുതജടാജൂടമകുടാം

വരത്രാസത്രാണസ്ഫടികഗുടികാപുസ്തകകരാം

സകൃന്നത്വാ ന ത്വാ കഥമിവ സതാം സന്നിദധതേ

മധുക്ഷീരദ്രാക്ഷാമധുരിമധുരീണാഃ ഫണിതയഃ

16

കവീന്ദ്രാണാം ചേതഃ കമലവനബാലാതപരുചിം

ഭജന്തേ യേ സന്തഃ കതിചിദ്‌അരുണാമേവ ഭവതീം

വിരിഞ്ചിപ്രേയസ്യാസ്തരുണതരശൃംഗാരലഹരീ

ഗഭീരാഭിര്‍വാഗ്ഭിര്‍വിദധതി സതാം രഞ്ജനമമീ

17

സവിത്രീഭിര്‍വാചാം ശശിമണിശിലാഭംഗരുചിഭിഃ

വശിന്യാദ്യാദിഭിസ്ത്വാം സഹ ജനനി സഞ്ചിന്തയതി യഃ

സ കര്‍ത്താ കാവ്യാനാം ഭവതി മഹതാം ഭംഗിരുചിഭിഃ

വചോഭിര്‍വാഗ്ദേവീവദനകമലാമോദമധുരൈഃ

18

തനുച്ഛായാഭിസ്തേ തരുണതരുണീശ്രീസരണിഭിഃ

ദിവം സര്‍വാം ഉര്‍വീം അരുണിമനിമഗ്നാം സ്മരതി യഃ

ഭവന്ത്യസ്യ ത്രസ്യദ്വനഹരിണശാലീനനയനാഃ

സഹോര്‍വശ്യാ വശ്യാഃ കതി കതി ന ഗീര്‍വാണ ഗണികാഃ

19

മുഖം ബിന്ദും കൃത്വാ കുചയുഗമധസ്തസ്യ തദധോ

ഹരാര്‍ധം ധ്യായേദ്യോ ഹരമഹിഷി! തേ മന്മഥകലാം

സ സദ്യഃ സംക്ഷോഭം നയതി വനിതാ ഇത്യതിലഘു

ത്രിലോകീമപ്യാശു ഭ്രമയതി രവീന്ദുസ്തനയുഗാം

20

കിരന്തീമങ്ഗേഭ്യഃ കിരണനികുരുംബാമൃതരസം

ഹൃദിത്വാമാധത്തേ ഹിമാകരശിലാമൂര്‍ത്തിമിവ യഃ

സ സര്‍പ്പാണാം ദര്‍പ്പം ശമയതി ശകുന്താധിപ ഇവ

ജ്വരപ്ലുഷ്ടാന്‍ദൃഷ്ട്യാ സുഖയതി സുധാധാരസിരയാ